كيف تطيل عمر بطاريتك

الطريقة الصحيحة لشحن بطارية الموبايل لإطالة عمرها: اني ديما من اول ما بديت نستخدم في الموبايلات كنت انفكر في مجموعة اسئلة متعلقة بالشحن باش انطول في عمر البطارية زعما أما احسن انخلي الموبايل لين يفرغ بعدها نشحنه لين يتعبا ؟ زعما نقدر نشحن أمتا ما نبي ولا انخليه لين يفرغ بكل ؟ نقدر انركبه في الشحن وانحيه هلبا مرات في أي لحظة تخطر علي بالي ولا من أول ما نحطه انخليه لين يتعبا ومنحيشي بكل لأن لو نحيته مرات يضر البطارية ؟ زعما لو كان خليته راكب في الشحن بعد 100% تفسد البطارية ولا ميصيرلها شي ؟ لازم لما نشحن فيه انصكره ولا انخليه مفتوح ؟ لما نشحن فيه نقدر نفتح الشاشة ونستخدمه ولا انخليه يشحن بس ؟ هادي الاسئلة كلها وغيرها من الأسئلة كنت انفكر فيها بشكل مستمر ونبيلها اجابات وباذن الله حنعطيكم الاجابات لكل انسان مهتم بي موبايله ويبي يحافظ عليه. أصدقائي ومتابعين من فترة وأني انقدملكم في مجموعة مميزة من الأبحاث والشروحات لأحدث الموبايل وأهم المزايا باش اتوضحلكم بطريقة ساهلة وبسيطة وتخليكم تختاروا موبايلاتكم اللي تناسبكم وتتعاملوا معاها بذكاء وتحافظوا عليها من أهم المواضيع اللي بحثت فيها هلبا وتكلمت عليها معاكم من قبل موضوع المعالج وكذلك موضوع سخونية الهاتف أثناء اللعب والشحن وكذلك موضوع الشاشة ونوعها وكيف تختار موبايلك والشاشة اللي تناسبك ما بين LCD و LED وأن لكل وحدة منهم مزاياها وعيوبها واليوم بنكلمكم علي موضوع جديد ايهم كل انسان يحب يطول عمر بطارية موبايله خاصة ان البطاريات في الاجهزة الجديدة غالبيتها تجي مدمجة في داخل الجهاز مش قابلة للفصل والتبديل بسهولة الا بعدما تفتح الجهاز عند حد متخصص الموضوع اللي اني شخصيا منحباش لأن الموبايل قد يكون فيه بيانات شخصية سهلة الاسترجاع وثاني شي الموبايل المفتوح شبه مستحيل يرجع زي قبل خاصة ان شركات الموبايلات بدت تستخدم في لصقة باش تصكر موبايلاتها بالاضافة للفيتيات وزيد عليها موضوع ان الموبايل تخشله ذرات الغبرة في اثناء عملية الفتح وعمره يقصر لذلك الحل الافضل هوا انك تتعلم كيف تحافظ علي عمر بطارية الموبايل امتعاك بدل ما تستهلكها بسرعة وتضطر تفتح الموبايل ( هذا الموضوع من بحث وكتابة نزار عبدالله الرجاء لمن يرغب في النقل المحافظة على حقوق النشر والتنويه لاسم المصدر وذلك تشجيعا للكاتب على مزيد من البحث والابداع ). لو كنت من النوعية اللي تحتفظ بموبايلها فترة أكثر من سنة إما من النوعية اللي متحبش تغير أو من النوعية اللي ظروفها متسمحلهاش بالتغيير المستمر هذا الموضوع مكتوب ليك. بعد أول سنة كلنا نلاحظ ان البطارية قوتها نقصت علي قبل وبدت تعطي فينا في وقت استخدام أقل وبعد ثاني سنة معظم التلفونات بطاريتهم صعب اتمشي يوم كامل وديما تبي شحن بعد ثلاث سنين عمر البطارية ينقص بشكل ملحوظ في معظم الأجهزة وتبي الشحن بشكل متكرر أكثر السبب في الشي هادا هوا ان البطارية من العناصر اللي تنقص قوتها مع طول الاستخدام لكن فيه مجموعة من النصائح والارشادات اللي تخلي البطارية في عمر سنتين تخدم كأنها في عمر سنة والبطارية اللي في عمر ثلاثة سنوات تخدم كأنها في عمر سنتين كذلك الاستخدام المش صح للشحن ايخلي البطارية اللي عمرها سنة تخدم كأنها عمرها سنتين واللي عمريها سنتين كأن عمرها ثلاثة يعني الموضوع معتمد عليك كيف تشحن موبايلك صح ولا غلط. البطاريات المستخدمة في جميع الموبايلات المعروفة اليوم اسمها lithium-ion حتى البطاريات اللي مكتوب عليها Li-Po هيا نفس النوع واسمها الكامل هوا Lithium Ion Polymer يعني حتى هيا في الاساس بطارية ليثيوم ايون نفس البطارية اللي بنديرو عليها بحثنا ونصائحنا وارشاداتنا واللي نيطبق علي هادي ينطبق علي الثانية اما بالنسبة للفرق بين النوعين هادا يبي موضوع بروحه ومش موضوعنا توا ولو تبو عليه موضوع يا ريت تكتبولي في التعليقات بعد البحث في هلبا مواقع ومصادر موثوقة باللغة الانجليزية وصلت لنتيجة مبنية علي تجارب علمية وحقائق واختبارات داروها خبراء في الموبايلات للاجابة علي كل الاسئلة والنتيجة هي كالتالي : الشحن الجزئي هو أفضل طريقة للمحافظة على عمر البطارية طريقة انك تخلي موبايلك يشحن لما قريب تكمل بطاريته لين يوصل 100% في الحقيقة هادي مضرة للبطارية أكثر من انها مفيدة والسبب هوا اختلاف الجهد Voltage طول عملية الشحن (صورة رقم 1) اللي يبدا ايزيد كلما شحنت البطارية أكثر وهادا مش كويس وكذلك التيارCurrent في الفترة هادي يكون ثابت لكن لما يوصل الشحن 70% يبدا التيار ينقص بشكل تدريجي والحقيقة العلمية هيا ان كلما كان الجهد أقل لبطاريات lithium-ion كلما كان أحسن وحافظت عليها لعمر أطول ونستنتجوا من كلامنا هادا ان عملية الشحن لفترة طويلة من 0 إلى 100 ايشكل اجهاد كبير وضغط عالبطارية ومش كويس ليها ( هذا الموضوع من بحث وكتابة نزار عبدالله الرجاء لمن يرغب في النقل المحافظة على حقوق النشر والتنويه لاسم المصدر وذلك تشجيعا للكاتب على مزيد من البحث والابداع ) من الكلام هادا وصل الخبراء لنتيجة أن طول فترة الشحن مش مفروض انها تتجاوز 60 نقطة مؤية يعني لو شحنك 20% اشحنه لين يوصل 20+60=80% كحد أقصى بعدها افصل الشحن الطريقة هادي اتضاعفلك من عمر البطارية يعني لو عمرها سنتين تقعد تخدم بطريقة ممتازة وكأن عمرها سنة وكلما تستخدم الشحن لفترة أقل يكون أحسن فمثلا لو شحنك 40% وشحنته لعند 60% بعدها فصلت الشحن وديما تستخدم في الطريقة هادي يعني 20 نقطة مؤية للشحن بطاريتك في عمر 3 سنوات تقعد تخدم كأن عمرها سنة وحدة بس الشحن اثناء النوم وانك تخلي موبايلك يشحن ويوصل 100% وانت امخليه راكب في الشحن ايقصر من عمر البطارية للاسباب التالية الاول ان البطارية تقعد تشحن ولما تهبط بنسبة صغيرة تشحن مرة تانية ولما تهبط شوية تشحن انت متلاحظش الشي هادا لكن هادا اللي يصير لأن الجهاز مش مقفل وشي طبيعي انه بيستهلك طاقة مش هكي وبس الخبراء دارو بحثهم واكتشفو ان حتى الأجهزة المصكرة مادام راكبة في الضي تقعد تاخد في نسبة من التيار حتى لو كانت بسيطة جدا وتافهة ما بين 200 ملي أمبير الى 500 ملي أمبير لكنها تأثر وتقصر في عمر البطارية ( صورة رقم 2 ) نفس الموضوع ينطبق علي الشحن في اثناء استخدام الموبايل سوا كان في الألعاب أو حتى في التصفح البسيط الموضوع مضر للبطارية والاسم العلمية للعملية هادي هوا Parasitic load والسبب هوا ان الاستخدام اثناء الشحن يقاطع في عملية الشحن التقليدية ويحول فيها لمجموعة من عمليات شحن صغيرة بناء علي قوة الاستخدام ويختلف في اثنائها الجهد والتيار بشكل كبير وهادي من أخطر العمليات علي عمر البطارية زيد عليها موضوع ارتفاع حرارة البطارية اللي هوا العدو الأول لعمر البطارية تأثير الحرارة علي عمر البطارية ( صورة رقم 3 ) بعد مرور سنة من عمر البطارية في الحرارة الطبيعية ما بين 25 الى 30 درجة مؤية مفروض البطارية تحافظ علي من 80 إلى 90 % من قوتها لكن لو ارتفعت الحرارة الى 40 درجة بشكل مستمر بعد مرور سنة البطارية تحافظ علي من 65 إلى 75 % من قدرتها علي لما كانت جديدة لكن لو كانت الحرارة 60 درجة في خلال 3 شهور بس من الاستخدام حتضعف البطارية وتوصل لنص قدرتها الشحن السريع ومشاكله عالبطارية : من اخطر الاشياء في شركات الموبايل المنافسة علي سرعة الشحن متع الهاتف لأن كلما انشحن الهاتف بطريقة بطيئة كلما كان افضل لعمر البطارية وكلما انشحن بطريقة سريعة ولمدة طويلة حيأثر بعد فترة علي عمر البطارية لذلك لو بتستخدم الشحن السريع حاول تشحن لمدة بسيطة بين 15 دقيقة إلى 30 دقيقة وتحول الشحن ورد بالك تخلي الشحن السريع راكب في الموبايل من 0 إلى 100 ورد بالك تخليه وترقد هادي من أكثر الحاجات اللي اتنقص في عمر البطارية المحصلة: بطاريات الليثيوم ايون من أفضل انواع البطاريات والمحافظة عليها مهم والاستخدام الخاطيء للشحن اينقص من عمر البطارية بشكل كبير على المدى الطويل - استخدام الشحن لفترات قصيرة من 20 الى 60 نقطة مئوية هوا أفضل طريقة باش اطول عمر البطارية - الشحن من 0 إلى 100 % والشحن في الليل لما يقعد الموبايل في الشحن وهوا واصل 100% اينقص من عمر البطارية - الشحن لين توصل 80% ايطول عمر البطارية وحاول ما تفوتش 80% قدر الامكان - استخدم الشحن السريع لفترات قصيرة من ربع الى نص ساعة فقط - الحرارة تقضي علي البطارية حاول تخلي موبايلك بعيد عالحرارة قدر المستطاع - ما تلعبش بي موبايلك ولا تتفرج عالافلام وهوا يشحن ومادابيك تخليه يشحن وهوا مرتاح بدون استخدام